Maiatzaren 25ean eta 26an egingo da aurten Portugaleteko Folklore Azokea. Ibilaldia Bizkaiko ikastolen jaiagaz bat egiteko atzeratu dabe, halan jente gehiago batzeko asmoz. Musikea, jantzea, tailerrak, erakustaldiak... egitarau polita prestau dabe.

Datorren astegoienerako, maiatzaren 24 eta 25erako, Antzerkiaz Blai! egitaraua atondu dabe Markina-Xemeingo Abarka Antzerki Taldeak eta Uhagon kulturguneak. Ikastaro bat eta antzezlan bi antolatu ditue.

Hilaren 31ra arte, beraz, arte eszenikoen ikuspegi barritzaileenak hartuko dau Alondigea, performance, berbaldi eta bestelakoen bidez. Ganerako jarduerakaz batera, 13 kreazino aurkeztuko dira, danak maiatzaren 22a eta 25a bitartean. Parte hartuko dabenen artean, aitatzekoa da Oscar Mata eta Espe Lopezek eratuko daben Psicodrama proiektua.

Euskal Herriko Naturearen III. Jardunaldiak egingo ditue egunotan Derioko Nekazaritza Eskolan, maiatzaren 23an eta 24an. Lehorreko ugaztunen konserbazinoa eta kudeaketea izango dira edizino honetako ardatz nagusiak.

Toure detektibearen bigarren istorioa idatzi dau Jon Arretxe idazle basauriarrak, 612 euro (Erein). Bilboko San Frantzisko auzoan kokatu dau hau nobela hau be, uriko Afrika txikian, Euskal Herriko ghettorik handienean.

Irati Bediaga galdakoztarrak idatzitako Beldarren hegaldia ipuinak irabazi dau Mikel Zarate haur literaturako saria. Holan erabagi dau Leire Bilbaok, Miren Agur Meabek eta Xabier Mendigurenek osotutako epaimahaiak, eta berak eroango dau 3.000 euroko saria. Liburua, barriz, udagoienean kaleratuko da.