'Gabrielen Lekua' sentikaria oinarri dauen disko-liburua aurkeztu dabe

Nagore Ferreira Zamalloa 2013-11-25 14:43   Musikea

Bilboko Kafe Antzokian aurkeztu dabe Gabrielen Lekua (Erroa argitaletxea) disko-liburua. Ez dogu izen bereko ikuskizun osoa lan barri honetan topauko, baina bai zati batzuk, eta ganera hainbat idazleren artikuluak gehitu ditue, tartean, Amaia Lasa, Paddy Rekalde eta Luigi Anselmirenak.

Bilboko Kafe Antzokian aurkeztu dabe lan barria, bagilean Gabriel Aresti kultur alkartea beraren barri emon eben leku berean. Alkarteko Xabier Monasteriok, Rafa Rueda musikariak eta Amaia Lasa eta Paddy Rekalde idazleak izan dira bertan.

Ez dogu Gabrielen Lekua ikuskizun osoa lan barri honetan topauko, baina bai zati batzuk. Diskoan Rafa Ruedak musikatu dituan zazpi olerkiez aparte, Andoni Egañak beren-beregi sortutako bertso bi (Aresti eta Basarri eta Beldurra gosari) gehitu ditue. Oier Guillanek, bestalde, diskoaren hasieran eta amaieran poesia bi deklametan ditu, Poesia mailu bat da eta Ni eta nik diodana.

Horrezaz gan, sei idazlek Arestik eurengan izandako eraginaren ganeko gogoetea egin dabe artikulu banatan. Amaia Lasa, Andoni Egaña, Oier Guillan, Hedoi Etxarte, Luigi Anselmi eta Paddy Rekalde dira egileok. Lasak Gabriel Arestiren eskuzabaltasuna nabarmendu dau, jente askori idazten segiduteko animoak emoten eutsozan. Nortasun handia eukala gogoratu dau. Eraginik handiena hizkuntzan izan ebala esan dau: Gu idazten hasi ginanean ez genkian zelan idatzi. Bere olerkiak irakurtean, konturatu ginan ez zala hain ikaragarria euskeraz idaztea. Idazle gipuzkoarrak Arestiri gutun irekia artikulua sortu dau.

Paddy Rekalderi, barriz, idazteko modua emon eutson Arestik, poesia idazteko modu erraz eta indartsua. Sasoi batean poesia itxia eta kriptikoa zan nagusi, nire ustez, horrek jente asko poesiatik urrundu eban. Rekaldek Aresti gurea, poemetan bizi zarena testua idatzi dau.

Belaunaldi berekoak izan ez arren, berean izandako eragina azpimarratu dau, oso hur bizi izan dot bere lana. Bilbo eta inguruko errealidadea batu eban bere poesietan, bere ingurua aztertzen eban. Egoera horretan, 50eko hamarkadan Bilbon, euskaldundu zan. Miraria izan zan hori, adierazo dau Rekaldek.

Rafa Ruedarentzat erronka potoloa izan da Arestiren poesiak aukeratu eta kanta bihurtzea. Bere olerkiak nahiko narratiboak dira, akaso horregaitik ez dira hainbeste musikatu, esan dau. Arestiren poesia guztiak irakurri eta aztertu ditu musikari mungiarrak, eta deigarrai egin jakozanak aukeratu ditu, besteak beste, Nire izena, Zorrotzako portuan aldarrika, Egia bat esateagatik eta Neure mendean. Testuok bere egin ditu Ruedak, nire estilora eta musikara ekarri dodaz, dino. Poesiek eurek erakutsi deutsie zelan egin bidea.

Kantak abuztuan grabau zituen Bilboko Kobaestudioan, Xanperen gidaritzapean. Rafa Ruedak (ahotsa, gitarrea, bajua eta tekladuak), Naia Membrillerak (prekusinoa), Iban Urizarek (klarinetea eta kornetea), Xanpek (bateria), Andoni Egañak (ahotsa), Arkaitz Estiballesek (ahotsa, ) eta Oier Guillanek (ahotsa) hartu dab eparte grabazinoan. Erroa argitaletxeak kaleratu dau disko-liburua.

Gabrielen Lekua disko-liburua salgai dago daborduko, eta izenburu bereko sentikaria be aurrera doa, hurrengo emonaldia zemendiaren 28an izango da, Bermeoko Kafe Antzokian, Udagoieneko Osterea egitarauaren barruan.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu