Hemen da Bilboko Errekaldeko II. Umorezko Antzerki Erakustaldia

| Ikusi handiago | Argazki originala

Umorezko antzerkia dator barriro Bilboko kultur programazinora Errekaldeko Umorezko Antzerki Erakustaldiaren bigarren edizinoagaz batera. Bilboko Udaleko Kultura eta Hezkuntza Sailak antolatuta, ekimen honek 19:30etatik aurrera ikuskizun antzeztuak eskainiko ditu martiaren 21etik 28ra bitartean eta apirilaren 4tik 7ra; horrezaz gan, umorezko film laburrak be ikusteko aukerea egongo da Zinebikluben eskutik, apirilaren 7an. Programa honek bertoko artistei euren obrak aurkezteko aukerea emoten deutse eta publikoari, Errekaldeko Udaltegian umorezko arteagaz barre algarak egiteko antzezle eta zinemagileen eskutik.

Errekaldeko II. Umorezko Antzerki Erakustaldia Hermanos Bolinga bertoko antzerki taldearen eskutik eta Puestos en libertad obreagaz hasiko da bihar martiak 21, alderdirik basatienean biziten ohituta dagozan bi personaien pasadizoak kontetan dituana. Bizitzaren adikzinoa daben bi izaki patetiko baina kuttun dira, kalterik egiten ez daben hiltzaileak, porrot bat bestearen atzetik, bide barriak bilatu nahi dituenak. Barre eta algaren artean, auzo guztietan dagozan galtzaileak irudikatzen ditue.

Martiaren 28an, Síndrome Clown andaluziar taldeak La prematura muerte de un viajante antzezlana aurkeztuko dau, Arthur Millerren obra ezagunaren parodia. Bi pailazok, XX. mendeko maisutasunezko lan hau irudikatzen saiatzen dira. Protagonistea dan Willy Loman, originalagaz fidela dan bersinoagaz interpretetan dau Raspa pailazoak. Eta bestetik, Rudo taldeko zuzendariak nahiago dau obra hau bere subtestuan oinarrituta aurkeztu. Atxakia horregaz, Rudok Willy Lomanek hainbat egoera xelebre bizitea lortuko dau. Barreak eta hausnarketea eragingo deuskuzan obrea izango da.

Kolectivo Monstrenko (Euskal Herria) taldeak apirilaren 4an hartuko dau umorearen lekukoa Antonio Remachado obreagaz. Antoniok bere enpresearen biziraupenerako ahalegin guztiak egiten ditu baina bere bizitzako amesa arrisku bizian dago eta ez dago prest orain dana galtzeko. Marrazoa hurreratzen dago baina bere kontrolaezinezko bildurrak zpramenaren mugak gainditzera eroango dau protagonistea. Zein da gure bizitzan lanak beteten dauen lekua? Biziteko lan egin edo lan egiteko bizi? Antoniok ez dauka bape argi.

Apirilaren 7an, umorezko zinemearen txandea izango da Zinebikluben eskutik, Umorezko Zine Erakustaldi bategaz. Fanta Ananas zuzendariaren Chigger ale; Andrew Napier errealizadore estadubatuarraren Grandma´s not a toastes; Yuval Yefet israeldarraren Yoter; Kepa Sojo euskal zuzendariaren Loco con ballesta film labur saritua; Jessica Vicente Villanueva espainiarraren Meeting with Sarah eta Borja Cobeaga donostiarraren Democracia lanak proiektauko ditue.

Oihan Vega telebistako aurkezle ezagunak emongo deutso amaierea II. Umorezko Antzerki Erakustaldiari apirilaren 11an Euskararen espektakulue lanagaz. Gure eguneroko bizitzan euskerearen erabilerearen inguruko galdera sakonak proponiduten dituan umorezko bakarrizketa ironikoa. Zergaitik praktiketan dogu sexua erderaz? Nork daki zenbat irauten dauen euskeraz? Zergaitik emoten deutsagu hainbeste gaztelaniari egunero? Umorez Oihan Vegak egunerokotasunean euskerearen erabilerearen haunsnarketea egitera konbidatzen dau publikoa.