Abian da Bertsotruk, bertso eskolen arteko desafioak antolatzeko egitasmoa

Bizkaie! 2015-11-16 16:29   Bertsolaritzea

Euskal Herriko Bertsozale Alkarteak azaldu dauenez, bertso eskolen artean sortzen diran desafioak batzeko eta antolatzeko sortu dabe Bertsotruk egitasmoa. Hileon hasi eta maiatzera bitartean, 26 bertso eskolatako kideek parte hartuko dabe bertan. Moltsoka banatu ditue eskolak eta alkarren kontrako saioak eratuko ditue.

Helduen bertso eskolen arteko hartu-emonak estutzeko asmoz sortu dabe Bertsotruk. Hain zuzen be, Euskal Herriko Helduen Bertso Eskolen Batzordeak abiau dau ekimena. 26 bertso eskolak emon dabe izena eta maiatzera bitartean alkarregaz lehian ibiliko dira.

26 parte-hartzaileak bederatzi moltsotan banatu ditue: Hiruna taldeko zortzi moltso eta biko beste bat. Bertso-eskola bakotxak moltsoko beste parte-hartzaileak hartuko ditu etxean eta, era berean, bere moltsoko ganerako taldeen etxera joan beharko dau.

Holan, emonaldi edo desafio ugaritan neurtuko ditue indarrak. Parte-hartzaileen esku egongo da aldi bakotxean zelako saioa antolatu: bertso saio arrunta, bertso afari edo bazkaria, antzerkia bertsotan edo jolasen bat.

Honeek dira bertso eskola parte-hartzaileak, moltsoka banatuta:

ALBE, Debagoiena eta Lesaka

Barañain, Durangaldea eta Zarautz

Mungia/Larrabetzu, Sakana eta Oñati

Gernika-Lumo, Harituz eta Lekunberri/Leitza

Enkarterri, Erniarraitz eta IEH

Agurain, Gabiria eta Lasarte-Oria

Aramaio, Hernani eta Zumarraga-Urretxu

Goierri, Kakiturri eta Txingudi

Markina-Xemein eta Orio