Gaur, abenduak 1, Liburuak Eskuko Telefonoetan ekimena aurkeztu dabe Donostian, liburuak eskuko telefonoetan irakurteko aukerea emoten dauen lehenengo plataformea. Egitasmoa Eleka Ingeniaritza Linguistikoa, Bluexare eta Alberdania enpresen alkarlanaren emoitzea da.

Aplikazino horren bidez, liburuak eskuko telefonoetara deskargau eta bertan erosotasun osoz irakurri ahal izango dira. Hori egiteko aukerea emoten dauen Euskal Herriko eta Estaduko lehenengo proiektua da, eta bere helburu nagusiak gazteen artean irakurteko zaletasuna bultzatzea eta literatura kontsumoa handitzea dira.

Aurkezpenean azaldu daben moduan, Durangoko Azokan Alberdaniak izango dauen saltokian argitaletxeak kaleratutako hiru libururen lehenengo kapituluak deskargau ahal izango dira bluethooth emisore baten bidez. Datorren urtearen hasieran, salmenta sistema bat jarriko dabe martxan Alberdaniako webgunean irakurleak obra osoak deskargetako aukerea izan daian.

Aplikazinoaren plataforma teknologikoa Bluexare eta Eleka enpresek garatu dabe, eta edukiak Alberdaniarenak izango dira. Proiektua aurrera eroateko, Hizkuntza Politikarako Sailburuordetzearen diru laguntzinoa izan dute.

Bizkaie!