Abian da 'Euskara Jendea: gure hizkuntzaren historia, gure historiaren hizkuntza' produkzinoa

Bizkaie! 2012-07-03 15:10   Barriak

Euskara Jendea: gure hizkuntzaren historia, gure historiaren hizkuntza, Ibaizabal Mendebalde Kultur Elkarteak produzidu dau Zenbat Gara kultur alkartearen laguntzinoagaz. Iraupen ertaineko sei dokumentalek osotzen daben dibulgazinoko lan honegaz publiko zabal bati aurkeztu nahi jako euskerearen eta bere herriaren historia.

Euskara Jendea egitasmoak Xamarrek 2006an Pamiela etxean argitaratutako izenburu bereko liburua dau abiapuntu eta ikusentzunezko esparruan egoan hutsunea betetera dator, lengoaia honek dauen zabalpenerako doea aprobetxauta.

Dokumental sortan maila goreneko hizkuntzalariek, historialariek, arkeologoek, antropologoek eta kulturgileek parte hartu dabe: Joseba Agirreazkuenaga (historialaria); Amaia Aire (irakaslea eta kulturgilea); Peter Bakker (hizkuntzalaria); Belen Bengoetxea (arkeologoa); Jacques Blot (arkeologoa); Antonio Breschi (musikaria); Iñaki Camino (hizkuntzalaria); William Anthony Douglass (antropologoa); Miren Egaña Goya (hizkuntzalaria); Iratxe Esnaola (informatikaria eta .eus ekimenaren koordinatzailea); Diego Garate (arkeologoa); Joaquin Gorrotxategi (hizkuntzalaria); Jose Angel Irigaray (kulturgilea eta idazlea); Neskuts Izagirre (antropologoa); Jurgi Kintana (historialaria); Joseba Lakarra (hizkuntzalaria); Juan Jose Larrea (historialaria); Beñat Oihartzabal (hizkuntzalaria). Lourdes Otaegi (literatura irakaslea); Jon Sarasua (bertsolaria eta idazlea); Elena Torregarai (historialaria); Mertxe Urteaga (arkeologoa); Hiromi Yoshida (euskEra irakaslea). Horreekaz batera, Euskal Herriko zein atzerriko txoko eta kokapen esanguratsuen irudiak (antzeko lanetan orain arte sekula agertu bakoak batzuk), garai historiko bakotxa girotzeko dramatizazino txikiak, ilustrazino eta grafismo erakargarriak eta atal bakotxerako egokitutako musikea topauko dogu dibulgazinoko dokumental sorta honetan.

Hizkuntza baten historia beren hiztunena da ezinbestez, edo, nahiago bada, hiztunen historia beren hizkuntzearena da. Euskereak, berez, ezin dau dezer egin; euskaldunek bakarrik moldatu, garatu, galdu, pobretu, aberastu, normalizau... leikie euskerea. Horregaitik, Euskal Herriaren historia azaldu nahi izatekotan, euskeraz berba egiten dauen jentearena azaldu behar da.

Lan hau euskaldunon hiztun komunidadearen historiaren arlo nagusiak azaltzen saiatzen da. Historiaurretik abiatuta gaur egunera arte, euskaldunak herri, kultura eta hizkuntza askogaz bizi izan dira euren hizkuntzea galdu barik.

Euskara Jendea dokumental saila talde lana da. Lan talde nagusia Xamarrek, Mikel Arredondok, Hibai Castrok, Adur Larreak, Lutxo Egiak, Lon Fernandezek eta Maria Uriartek osotzen badabe be, kolaboratzaile sarea be oso zabala da.

Ibaizabal Mendebalde alkartea euskerazko ikusentzunezko herritarragoak bultzatzeko sortu zan Bilbon. Beste gauzen artean, Ibaizabal Telebista martxan jarri eban interneten. Azken hamazortzi hileotan, baina, indar guztia Euskara Jendea egitasmora bideratu dabe.

Zenbat Gara alkarteak Bilboko Kafe Antzokia dau erreferentzia gune nagusi. Horrezaz gan, hamaika kultur jarduera sustatzen ditu, gehienak Bizkaiko uriburuan.

Ikusi argazki guztiak handiago